青蘢蘢的　石槽

這種　火山岩頂生出的

海菜　形成一種風景

海湧上愛佇這

放煙火

弄水花

——〈綠石槽海岸〉

康原和攝影家許萬八聯手，來寫臺灣的海岸，予咱掀開這本冊的時，影像配歌詩，烏白的文字配彩色的攝影，無聲的文字變有聲的海湧，風講古、雲穿衫、鳥仔唱歌。

——路寒袖（臺灣知名詩人作家）

《臺灣島。海岸詩》這本冊是攝影家許萬八佮阮，透過鏡頭佮臺語詩，來紹介咱臺灣四邊海岸的景色，阮用影像佮詩歌𤆬逐家來臺灣行一輾，欣賞海邊的地質佮人文、歷史，佮攝影家愛去翕相的所在，共同來讚嘆臺灣真正是一个美麗的寶島。

阮規本冊有分四輯：第一輯「岸上人間」：這輯攏總三十二首詩，順著海岸邊一寡旅遊景點，也是古蹟、港口、燈塔，寫出海邊人的生活佮遊覽客的形影。第二輯「地質詩情」：攏總二十首詩，臺灣四周海岸線，有千變萬化的地質，產生各種奇形怪狀的雅石，變成攝影家佮旅遊客參訪的所在。第三輯「海上掠影」：攏總二十首詩，這攏是海中討海人的身影，有發展觀光打造咖啡廳、漁民掠魚苗栽的情形，嘛有衝湧活動選手佇海頂的英雄屈勢。第四輯「生態之歌」：攏總有二十一首詩，有海岸邊的各種野鳥、砂馬仔、花跳等沙坪的生態。