《賴和的相思》這本冊攏總有八十首詩，分成四輯，主題包含台灣這塊土地上發生的各種阮思考的代誌、抑閣有台灣歷史的發現、地景的描寫、生命意義的探討，詩中有阮家己的思想觀念佮期待，就親像阮佇〈耕咱兜的田園〉第一段詩寫的，是阮對台灣文化揣路人的一種心情紀錄。

對半線行過磺溪到彰化的這塊田園

攏種外來的植物　粗枝厚葉蔭影崁頂

原生種子煞袂發芽　失去台灣人的志氣

拍見土地的靈魂　不肖的囝孫心目中

有黃河攏無賴河　日治時期

和仔仙 拍開台灣新文學的門窗

引進　民主自由新觀念　教咱

喙舌佮筆尾合一　寫出低氣壓的山頭

攑一枝秤仔佮警察捙拚　喝著勇士應為義鬥爭

種入公理佮正義的種子　發出批判佮抗議磺溪精神

規本冊分成四輯：

第一輯「揣路的人」攏總二十首，對轉去故鄉揣路的心情變化開始，佮走揣台灣的大街小巷，發現鄉親的常民歷史佮生活情形，用母語詩去建構的地理、歷史、生態、環境的變遷。

第二輯「賴和的相思」：透過一九三○年鄉土論戰語言的問題開始，攏總二十一首中，講的是台灣人佇這塊土地，為著爭民主自由的生活，追求台灣獨立的精神咧拍拚佮犧牲。

第三輯「月台的春天」攏總二十一首，這輯的作品攏是阮佇台灣各地行踏，有時陣去旅遊、講演、帶學生去戶外教學，看著的地景有有詩情的感動。

第四輯「天頂彼粒星」攏總有十八首，有〈天星〉、〈漁女的身影〉中對已經離開世間阿母的數念開始，嘛有〈煙吹佮老父〉懷念阮天頂的老爸，是一種對親情的描寫。也有寫一寡對台灣社會上的慈善家的尊敬。

本書特色

1.收錄康原80首台語詩集，追隨賴和的足跡，見證台灣的歷史足跡。

2.康原的台語詩，以最台灣的語言，書寫屬於台灣的人文風情與故事。