投資如做人，望落最易做到嘅，其實最難。看似捷徑，其實係兜一大條路。

呢本書唔係畀個冧把你買完夠發達，亦唔係教你睇圖睇年報，又唔會教你一套系統你跟住幾時買幾時賣。我都好想可以咁簡單，但真係唔得。得嘅，就唔會有窮人啦，咁簡單嘅常識都唔明？

有人以為投資係要揀到好股票，錯，超錯。N咁多人十幾廿年前買過騰訊(700)，N咁多人十年八年前買過Big Tech，但有幾多個可以贏到尾？你求其十年八年前買Nasdaq指數都贏幾倍啦，但幾多人個倉真係升到幾倍？

即使你搵啱神仙，點解個個都係買嗰啲冧把，但有啲人賺十倍，有啲人輸錢？同樣地，個個都係睇嗰啲圖，睇嗰本年報，點解有啲人搵到錢，有啲人買乜都輸？

歸根究底，問題就係你自己嘛。

呢本書，教你改變你自己。平時基本功打得好，諗嘢方向啱，自然就贏得多輸得少。相反平時不學無術學壞手勢嘅，畀你好彩扑中第一隻十倍股，之後你都會係輸返晒出嚟。

以前蔡東豪寫過，「投資係個人性格嘅延續」，我相當同意。你嘅投資，反映緊你點諗嘢，你嘅世界觀。不過我認為，性格唔易改，但投資思想，係有得改的。

呢本書就係話你知，咁多年來我係點思考，讀書求職擇業做人處世甚至創作投資有乜心得。睇完，你自然內力大增，自己識揀股自己知道點買賣。